承蒙您啊!~客家風情一日遊

海水變寒兮時辰,北國兮水鴨就向南飛;秋風轉冷兮時候,客人庄兮柿糕就黃 sim4 sim4,對著企置中部兮我熱情呼請.

每一冬,阮欲似呢過冬兮海鳥同款,偎北兮客人庄就是阮定著要報到兮所在~值這柿糕黃 sim4 sim4 兮秋冬中間.

沿路,十一月兮菅芒花一叢復一叢,生得密密是,山頭好親像一夜白髮兮憂愁人,加添著秋冬寥蕭兮氣氛.欲入來這個客人庄進前,總嘛未當無去探望彼個水姑娘仔-峨嵋溪.伊猶原彼爾嫻靜、優雅,恬恬照著伊兮腳步,嬝娜多姿,轉踅過一庄復一庄.

踮橋頭和伊對向一霎久了後,阮就踏入到北埔慈安宮面前.自廟前總佮看起來,鬧熱滾滾,和一般兮台灣庄跤所在兮菜市或者是廟口無啥差.若行入去中間,才會發見客人庄無同款就是無同款,逐擔所賣兮物仔,雖然攏爭差無偌濟,不是客人菜包、麻薯,就是糕仔(粄條)、柿糕...卻是這寡食物全全手工作兮,價數俗復好食.賣麻薯兮歐巴桑現場將一包麻薯分做都好一喙一粒兮細粒麻薯,若是仰咱家己一塊一塊擠,恐將喙涎就要流咧幾偌斤,結果,人伊干但用二腳箸,二三下半手,真正 su4 等,不免五分鐘,就處理得清汽 dam dam,予我食得一擺高品質兮客人麻薯,土豆芳猶置喙角旋來旋去呢!

這爿賣食兮、賣 oumiyagei兮,滾強強,彼爿四界傳來大細聲兮選舉宣傳車,嘛真拚勢,輸人不輸陣,予阮耳孔所聽著兮,全是正港兮客人話.斟酌佮聽,復真有意思,有淡薄仔熟似呢!有兮恰若廣東話,有兮強欲像閩南語,有兮好親像北京話.花花仔聽起來,聽上有、上濟擺兮一句話,就是-承蒙您啊! 大先不知意思,等了解後,真正是心適,這和台語兮古雅是有逼兮啊!北京話講 謝謝,實在是不如客人講 承蒙您 彼爾有意思呢!比較一下就知啦!客人仔要表達多謝兮意思,竟然用得這爾藝術兮語言,一句 承蒙您啊! 不但古雅,又復是盡在不言中,後韻綿綿,使人聽得心醉,契摩真好!

日頭欲落山兮時,涼冷兮暗風,伴著宣傳車放送頭一聲復一聲兮 承蒙您啊! 親切誠懇兮話語 dei5 阮兮跤步向南行...

2001年孟冬
評論: 0 | 引用: 0 | 閱讀: 17424